ईपरी न्यूज बरेङ ।
बागलुङको बरेङ गाउँपालिका लगायत छिमेकी पालिका जैमिनी नगरपालिका, गुल्मीको कालि गण्डकी र चन्द्रकोट गाउँपालिका लगायत पछिल्लो २४ घण्टा देशभर अबिरल वर्षा भैरहेको छ ।
वर्षाका कारण बरेङ गाउँपालिका भित्रका रिङरोड बाटोहरु अवरुद्ध भएका छन् । बरेङ देखि सदर मुकाम बागलुङ तर्फ जाने आउने मोटर बाटोहरु सञ्चालनमा नरहेकाले यात्रु वाहक सवारी साधनहरु सञ्चालनमा आएका छैनन् । बरेङ गाउँपालिकामा रहेका मजुवा खोला, हुग्दिखोेलामा पनि वर्षाका कारण पानीको वहाव बढेको छ । त्यस आसपासमा रहेका वस्तीका नागरिक सतर्क रहन गाउँपालिकाले आग्रह गरेको छ । जैमिनी नगरपालिकाका रुम्टाखोला लगायत सेराखोलामा पनि पानीको वहाव बढेको छ । काली गण्डकी कोरिडोर पूर्णरुप अवरुद्ध छ ।
बागलुङ न।पा।५ बान्द्रे स्थितमा सडक माथिबाट पहिरो आई बागलुङ देखी बेनी रत्नेचौर हुदैं जाने सडक खण्ड अवरोध रहेको छ । पर्वतको कुश्मा नगरपालिका–१ मालढुङ्गामा खसेको पहिरोले म्याग्दी र मुस्ताङलाई राष्ट्रिय राजमार्गसँग जोड्ने मालढुङ्गा–बेनी सडक अवरुद्ध बनेको छ । केही दिनदेखि निरन्तर परेको अविरल वर्षाका कारण डुबानमा परेको विश्वकै ठुलो शालिग्राम शिला र जोखिममा परेको छ । नदीमा बहाब बढ्ने क्रम बढेपछि सेतीवेणीबजारका स्थानीय त्रसित बनेका छन् ।
तानसेन–रिडी कोरला सडक पनि बन्द छ । म्याग्दीका विभिन्न ठाउँमा पहिरो जाँदा बेनी–जोमसोम सडक बन्द छ । वर्षासँगै आएको पहिरोले अर्घाखाँचीको गोरुसिङ्गे–सन्धिखर्क सडक खण्ड अवरुद्ध भएको छ । यस्तै रोल्पाको शहीदमार्ग र दाङको घोराही–तुलसीपुर सडक पनि बाढी पहिरोले बन्द छ । बझाङको मालाभीरमा पहिलो जाँदा जयपृथ्वी राजमार्ग बन्द छ ।
पूर्व–पश्चिम राजमार्गको नवलपरासी चोरमारा सडक र मुग्लिन–पोखराको दमौली क्षेत्रमा लेदो र पहिरोले गाडी गुड्न समस्या भएको छ । पाल्पाको अर्गलीमा पहिलो जाँदा पाल्पा–गुल्मी सडक बन्द भएको छ । रिडी–तम्घास सडक र पाल्पा–अर्घाखाँची सडकमा पनि गाडी चल्न सकेका छैनन् ।
गुल्मीमा पहिरोमा पुरिएकी एक महिलालाई जीवितै उद्धार गरिएको छ । रुरुक्षेत्र गाउँपालिका ३ अन्र्तगत थोर्गाको ठाँटीमा आज बिहान स्थानीय उजेली विकको घर पहिरोले पुरेको हो । पहिरोले पुरिएकी ४० वर्षीया उजेली विकलाई स्थानीयवासीको सहयोगमा जीवितै उद्धार गर्न सफल भएका छन् ।
दोलखाको गौरीशङ्कर गाउँपालिका–९ स्थित डोडाङमा अविरल वर्षापछि आएको बाढीमा परेर सोही स्थानका एक जना बेपत्ता भएका छन् भने तीन वटा घर बगेका छन् ।
पश्चिम राप्ती, बबई, नारायणी, कालीगण्डकी र कोशी नदीमा बाढी कतै सतर्कता तह र कतै खतराकै तहमा पुगेको छ । ललितपुरको खोकनामा बाग्मती नदी, सिन्धुपाल्चोकको नाकोटे र कपिलवस्तुको बनगाईमा कोइली नदी अहिले खतराको तहभन्दा माथि पुगेका छन् । विमलनगरमा मर्स्याङ्दी नदी, चितवनको देवघाट र नारायणी पुलमा नारायणी नदी, भक्तपुरको जगातेमा हनुमन्ते खोला, पर्वतको नयाँ पुलमा मोदी खोला र झापाको निन्दा खोला सतर्कता तहमा पुगेका छन् ।
मौसम पूर्वानुमान महाशाखाले भोलिसम्म देशका विभिन्न ठाउँमा बाढीको जोखिम रहेको भन्दै उच्च सतर्कता अपनाउन आग्रह गरेको छ । आज देशभरका धेरै स–साना नदीमा बहाव बढ्ने तथा गण्डकी, लुम्बिनी, कर्णाली र सुदूरपश्चिम प्रदेश भई बहने केही स–साना नदीमा आकस्मिक बाढी आउन सक्ने महाशाखाले जनाएको छ ।
लेखकको बारेमा
प्रतिक्रिया