काठमाडौं । ‘जोगिन्दर’ का रुपमा आफूलाई चर्चित बनाएका कलाकार तथा प्रस्तोता शिव शंकर रिजालले ‘जोगिन्दरको पान दुकान’ नामक कार्यक्रम सञ्चालन गर्ने भएका छन् । यसअघि ११ वर्षसम्म यसको सिरिज सञ्चालन गरेर चर्चामा ल्याएका उनले सिजन–२ का रुपमा यो कार्यक्रम सञ्चालन गर्ने भएका हुन् ।

उनको यो कार्यक्रम बागमती टेलिभिजन एचडीबाट प्रसारण हुने भएको छ । कार्यक्रमको निर्माण र निर्देशन समन अधिकारीले गर्ने भएका छन् । बिहीबार बागमती टेलिभिजनका प्रसारण प्रबन्धक तुलसी बाँस्कोटा र रेस्क्यु क्रियशन प्रा.लि.का प्रबन्ध निर्देशक समेत रहेका समन अधिकारीले कार्यक्रम निर्माण र प्रसारण सम्झौतामा हस्ताक्षर गरेपछि कार्यक्रम आउन लागेको जानकारी दिइएको हो ।

कार्यक्रम प्रस्तोता रिजालले उक्त कार्यक्रम हरेक बिहीबार बेलुका ८ः३० बजेदेखि ९ बजेसम्म प्रसारण हुने जानकारी दिए । उनका अनुसार त्यस कार्यक्रममा विभिन्न क्षेत्रमा ख्याती कमाएका व्यक्तित्वहरुलाई बोलाएर मनोरञ्जनात्मक संवाद गरिनेछ । मधेशवासीको लवजमा प्रस्तुत हुँदै रिजालले कार्यक्रमलाई सन्देशमूलक बनाउने समेत जानकारी दिए । उनका अनुसार कार्यक्रम यही फागुन महिनाको तेश्रो हप्ताबाट प्रसारणमा आउनेछ ।

लेखकको बारेमा

बिशाल खबर